استقيمو يرحمكم الله… التقدير مش رفاهية… التقدير حق

بقلم : الاعلامية نرجس عبد الله قدا

في ناس بتتعب، بتدي من وقتها ومجهودها وقلبها، من غير ما تستنى مقابل مادي… بس جواها انتظار واحد بسيط: كلمة “شكراً”، نظرة احترام، إحساس إنها مش بتتعب على الفاضي.

التقدير هو الوقود الحقيقي لأي إنسان. ممكن واحد يكمل طريقه كله بكلمة حلوة، وممكن يقف في نص الطريق بسبب تجاهل. لأن اللي بيشتغل من قلبه، مش محتاج فلوس قد ما محتاج يحس إن تعبه شايفينه، وإن وجوده فارق.

اللي ما يعرفش يقدّر، بيخسر ناس كانت ممكن تفضل معاه العمر كله. لأن العطاء من غير تقدير بيتحول مع الوقت لتعب، والتعب بيتحول لصمت، والصمت بيخلي أجمل العلاقات تنهار من غير صوت.

خلّي دايمًا في بالك…
الكلمة الطيبة مش بتكلفك حاجة، لكنها ممكن تساوي عند غيرك كل حاجة.
والتقدير مش ضعف… التقدير ذوق، وأصل، وإنسانية.👌